Туркэд суралцдаг Монгол оюутны холбооны удирдах зөвлөлийн гишүүд, төлөөлөлтэй Элчин сайд Р.Болд 4 дүгээр сарын 18-ны өдөр цахим уулзалт хийж, тус холбооны сүүлийн үеийн үйл ажиллагааны талаар сонсож, монгол оюутнуудын өмнө тулгарч буй бэрхшээл хүндрэл, тэдгээрийг шийдвэрлэх боломж, арга замын талаар санал солилцов.
Засгийн газраас хэрэгжүүлж буй “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө”-ний дагуу банк санхүүгийн байгууллагуудтай хамтран ажлын байрыг дэмжих, хөдөө аж ахуйн зээлд хамрагдах зээлдэгч нарт үзүүлэх хүүгийн хөнгөлөлтийн зардлыг батлагдсан төсвийн хүрээнд зохицуулалт хийх замаар олгох, 2022-2024 онд шаардагдах зардлыг жил бүрийн төсөвт тусгаж байхаар болсон. Ажлын байрыг дэмжих зээлтэй холбоотой гэрээг Монголбанк, Зээлийн батлан даалтын сан, Хадгаламжийн даатгалын корпораци, банкууд байгуулах юм. 4 дүгээр сарын 20-ны гүйцэтгэлээр тус төлөвлөгөөний хэрэгжилтийн хүрээнд 32082 ажлын байрыг хадгалаад байна. Ажлын байрыг дэмжих зорилтын хүрээнд аж ахуйн нэгж, иргэдэд жилийн 3 хувийн хүүтэй зээлийг банкуудын чөлөөт эх үүсвэрээр олгож байгаа бөгөөд нийт 8092 зээлдэгчийн 563,5 тэрбум төгрөгийн 3 хувийн хүүтэй зээл олгогджээ. Тухайлбал, 1228 аж ахуйн нэгжид 310 тэрбум төгрөг, 6870 иргэний 253,5 тэрбум төгрөгийн зээл олгогдоод байна. Аж ахуйн нэгжийн зээлийн хувьд Зээлийн батлан даалтын сангаас 4,6 тэрбум төгрөгийн зээлийн батлан даалт хийгджээ. Монголбанкны репо санхүүжилт буюу дахин санхүүжилтийн зээлийн тухайд 1,619 зээлдэгчид 260.0 тэрбум төгрөгийн зээл олгосон бол ипотекийн 6 хувийн хүүтэй зээлийг 3,064 зээлдэгчид 226.8 тэрбум төгрөгийн зээл олгосон байна.
БНТУ-ын Дотоод хэргийн яамнаас орон даяар хэрэгжүүлж буй хөл хорионы дэглэмийг 2021.04.29-ний өдрийн 19.00 цагаас 2021.05.17-ны өдрийн 05.00 цагт чангатгах шийдвэр гаргасан. Хатуу хөл хорионы дэглэмийн үеэр дараах зохицуулалтыг авч хэрэгжүүлж байна. Үүнд:
- Хүнс, эм, цэвэрлэгээний бүтээгдэхүүний худалдаа, боловсруулах үйлдвэрлэл, тээвэр ложистикийн салбарт үйл ажиллагаа явуулж буй ААН, байгууллагаас бусад худалдаа, үйлдвэрлэл эрхлэгчдийн үйл ажиллагааг зогсооно,
- Хот хооронд зорчих нийтийн тээврийн хэрэгсэл, зорчигчдын тоог 50 хувиар бууруулж, зайлшгүй шаардлага гарсан иргэдийг эрх бүхий байгууллагаас олгосон зөвшөөрөлд үндэслэн зорчуулна.
- Ресторан, хоолны газрууд 00.00 цаг хүртэл зөвхөн хүргэлтийн үйлчилгээ үзүүлнэ.
- Хүнсний дэлгүүр, супермаркетууд 10.00-17.00 цагт ажиллана. /Супермаркетууд Ням гарагт амарна/
- Банкны салбарууд 10.00-16.00 цагт иргэдэд үйлчилгээ үзүүлнэ.
- Зөвхөн аялал жуулчлалын зорилгоор ирсэн гадаад иргэдэд хатуу хөл хорионы дэглэм үйлчлэхгүй байж болно.
- Өмнөд Африкийн Бүгд Найрамдах Улс, Бразил, Бүгд Найрамдах Энэтхэг Улсаас Туркэд ирэх зорчигдийг 14 хоног тусгаарлаж, РСR шинжилгээний хариу сөрөг гарсан тохиолдолд тусгаарлалтыг цуцална. Бусад улсаас ирэх зорчигчид сүүлийн 72 цагийн дотор өгсөн PCR шинжилгээний сөрөг хариутай байх шаардлагатай.
Монгол Улсын Ерөнхийлөгчийн сонгуулийн санал авах ажиллагааг 2021 оны 5 дугаар сарын 30-ны Ням, 31-ний Даваа гаргуудад 07:00-22:00 цагт ЭСЯ-ны байранд зохион байгуулна.
Иргэд та бүхнийг сонгуульд идэвхтэй оролцохыг урьж байна.
Монгол Улсаас БНТУ-д суугаа ЭСЯ, Истанбулд суугаа ЕКГ болон Туркэд суралцагч монгол оюутны холбоо хамтран тус улсад магистр, докторны зэрэг горилон суралцаж буй оюутнуудын дунд эрдэм шинжилгээний хурлыг цахимаар зохион байгуулав. Эрдэм шинжилгээний хуралд Туркийн 7 хотын 8 их дээд сургуульд суралцаж буй оюутнууд илтгэл хэлэлцүүлснээс Каясери хотын Эржиес их сургуулийн докторант Б.Батсайхан “ Вакцинжуулалтын дараах цар тахлын нөхцөл байдал” илтгэлээр тэргүүн байр, Анкара хотын Хажеттепе их сургуулийн магистр Э.Номин-Эрдэнэ “Халх журам хуулийн тухайд” илтгэлээр дэд байрыг тус тус эзлэв. Энэ удаагийн хурлын шүүгчдээр Измир хотын Катып Челебе их сургуулийн түүх, археологийн тэнхмийн багш, др. Р.Мөнхтулга, Истанбулын их сургуулийн монгол хэл, бичгийн багш Ч.Ганжидмаа, орчуулагч нийтлэлч Л.Каяа, Туркэд их дээд сургууль төгсөгчдийн холбооны гүйцэтгэх захирал Ч.Золжаргал нар ажиллав. Элчин сайд Р.Болд хурлыг дүгнэн хааж, Тэргүүн, Дэд байр эзэлсэн илтгэгчдийг мөнгөн шагналаар урамшуулав.
Элчин сайд Р.Болд Истанбул хотноо Туркэд анагаах ухааны боловсрол эзэмшиж, ажиллаж байгаа Монгол эмч нартэй уулзаж, тэдний санал бодлыг сонсов.
